正向迎面DSE放榜 (一)

唔知各位DSE嘅同學仔面對即將放榜嘅心情係如何呢？

我相信大家用咗好長時間準備呢個文憑試，同時亦好努力溫習，希望可以攞到好成績，所以大家可能都會有少少緊張😫，加少少嘅期待🤩。你可以鼓勵吓咁努力嘅自己！👏

喺小學同埋中學嘅學習生涯入面，大家都經歷咗好多嘅考試，試過攞到好成績，亦試過失敗、迷惘。而文憑試係一個大型嘅公開考試，同樣會有機會考得好或唔好。無論滿唔滿意結果，都要知道考試成績並唔完全反映自己嘅價值。如果今次考得唔太理想，會唔開心都係人之常情，呢啲時候即管同身邊嘅人傾訴。但咁唔代表你要因此否定自己，反而要睇得更闊，留意同欣賞自己嘅價值。

DSE嘅成績已成定局，但係你嘅成長同學習能力仲有不斷發展嘅空間。我哋可以從今次經驗更了解自己。Martin Seligman博士表示：「建立甚麼是強大，而不是改正錯誤。」所以，我哋可以選擇有技巧地集中加強自身嘅強項去進步，而唔係一蹶不振，咁樣先會令我哋變得強大。你做得到㗎。

. . . . . . . . . . . . . . .

撰文：Jaffi

插畫：Elim

外框設計：Elim